Á undanförnum vikum og mánuðum höfum við öll fylgst með skelfilegum afleiðingum eldsumbrota nærri Grindavík á byggð og íbúa þar. Hugur landsmanna er hjá Grindvíkingum enda hafa þeir búið við mjög erfiðar aðstæður og mikla óvissu. Við stöndum öll með þeim og vonumst til að lausnir á aðstæðum þeirra líti dagsins ljós sem allra fyrst og óvissu ljúki.
Gossvæði ofan Hafnarfjarðar geti farið af stað
Atburðirnir við Grindavík hafa vakið upp umræður um hættur annars staðar vegna eldsumbrota. Bent er á að umbrotin geti færst yfir til annarra gossvæða og þar hefur meðal annars verið rætt um gömul gossvæði ofan Hafnarfjarðar og talað um að hraunrennsli frá þeim geti náð til bæjarins. Ármann Höskuldsson, eldfjallafræðingur, hefur í opinberri umræðu sagt að í framtíðinni verði Hafnarfjörður erfiðasta svæðið vegna náttúruvár vegna eldgosa.
Vel sóttur og upplýsandi borgarafundur Samfylkingarinnar
Til að mæta þessari umræðu hélt Samfylkingin í Hafnarfirði opinn borgarafund um málið þriðjudaginn 23. janúar. Frummælandi fundarins var einmitt áðurnefndur Ármann Höskuldsson, eldfjallafræðingur. Yfirskrift fundarins var; Eldsumbrot – er Hafnarfjörður í hættu? Hann var afar vel sóttur og greinilegt að bæjarbúar hafa mikinn áhuga á málefninu. Að loknu erindi Ármanns hafði hann í nógu að snúast við að svara fyrirspurnum fundargesta og var um mjög upplýsandi fund að ræða.
Unnið að hættumati en umræða nauðsynleg
Á vegum Veðurstofu Íslands og Almannavarna er nú unnið að gerð hættumats fyrir höfuðborgarsvæðið vegna mögulegrar goshættu í byggð og stefnt er að því að það liggi fyrir í vor. Hér er um að ræða alvörumál sem þarfnast opinnar og hreinskiptinnar umræðu. Það kom einmitt fram í máli Ármanns að mikilvægt væri að Hafnfirðingar og aðrir íbúar höfuðborgarsvæðisins hæfu umræðuna. Samfylkingin hefur þegar óskað eftir upplýsingum um það hvar sú vinna við gerð hættumats er stödd og farið fram á kynningu á henni í bæjarráði. Einnig höfum við kallað eftir viðbragðsáætlun Hafnarfjarðar vegna mögulegra eldsumbrota eða annars konar náttúruvár sem kann að hafa áhrif á byggð og íbúa í Hafnarfirði og við munum fylgja málinu eftir á næstu dögum og vikum á vettvangi bæjarstjórnar. Ekki má heldur gleyma að nú er hafin vinna við gerð nýs aðalskipulags fyrir bæinn og sú vinna ætti að taka mið af þróun þessara mála.
Æðruleysi og fyrirhyggja
Flestum er ljóst að hér er alvörumál á ferðinni sem þarf að nálgast af yfirvegun. Náttúruöflin eru ekki til að leika sér með en þau eru líka ólíkindatól og þróunin er mikilli óvissu háð. Það á bæði við um tímasetningar eldgosa sem og með hvaða hætti þau og hraunrennsli úr þeim þróast. Í þessari baráttu er rétt að mæta verkefninu af æðruleysi en á sama tíma er líka rétt að hafa fyrirhyggju að leiðarljósi.
